శ్రీ అన్నపూర్ణా సమేత కాశీ విశ్వేశ్వర స్వామి వారి దేవస్థానం

పలనాడు సీమలో నకరికల్లు ప్రాంతంలోని నరసింగపాడు గ్రామములో ఆది దంపతులు అన్నపూర్ణ కాశీ విశ్వేశ్వరులుగా వెలసి విరాజిల్లుతున్నారు. ఈ క్షేత్రము అతి ప్రాచీనమై అనాదిగా సిద్ధపురుషుల చేత అర్చించబడుతున్నది. ఈ ఆలయం అతి ప్రాచీనమనుటకు ఆలయ అధిష్టాన మూర్తులు మరియు గర్భాలయమునకు వెనుకనున్న పడమటి గోడ మీద వున్న నాగకన్య, క్షేత్ర గోడకు వాయువ్య దిశలో బయట ఉన్న నాగ దేవతా మూర్తులు నిదర్శనాలుగా నిలుస్తున్నాయి. మహా మహిమాన్వితులైన, మానవాతీత శక్తి సంపన్నులైన, పవిత్ర జీవులైన ఋషీశ్వరులు, సిద్ధులు ప్రతిరోజు అర్ధరాత్రి వేళ తేజోరీతిలో వచ్చి ఈ ఆలయంలో ఉన్న కాశీ విశ్వేశ్వరుడిని అభిషేకించి ఆ అర్చనా ఫలితాన్ని "తత్ బ్రహ్మార్పణమస్తు" అని ధారపోసి వెళుతున్నారు. ఎందరో భక్తాగ్రేసరులు ఆ ఋషీశ్వరాదులను చూసి తరించిన దృష్టాంతములు అనేకం కలవు. ఈ గ్రామమునకు దగ్గరలో శివ నామముతో "త్రిపురాంతకం" అనే ప్రాంతములో నరసింగపాడు కొలువు తీరి ఉండగా, ఈ నరసింగపాడు గ్రామములో విశ్వేశ్వరుడు పూజలందుకొనుట యాదృచ్ఛికం కాదు. ఇది కేవలం శివ కేశవ లకు భేదము లేదని తెలిపే దైవసంకల్పమే. శాలివాహన శకం 1099-1100 సం|| (అనగా ఆంగ్ల 1178 సం||) లో సుప్రసిద్ధమైన ఆంధ్ర మహాభారత యుద్ధముగా ప్రాచుర్యము పొందిన పలనాటి యుద్ధ రాజు వంశీయులు, ఈ క్షేత్రమునకు వచ్చి స్వామివారిని దర్శించి అనుగ్రహ పాత్రులైనారని ఐతిహ్యక గ్రంథములలో ఉన్నది. ఆ కాలములో ఉత్తర భారతంలో ఉన్న మొక్క ధామముగా ప్రసిద్ధిపొందిన కాశీ క్షేత్ర దర్శనం అతి వ్యయ ప్రయాసలతో కూడి దుర్లభముగా ఉండేది. కానీ ఎందరో మోక్షకాములు ఈ క్షేత్రమును దర్శించి స్వామి వారిని ఆరాధించి శివ సాయుజ్యం పొందారు. అందుకే ఈ క్షేత్రము "పలనాటి కాశీ"గా ప్రశస్తి నొందినది.

పూర్వము నరసింగపాడు, గుత్కపల్లి, గుత్తికొండ గ్రామ ప్రాంతములు అరణ్యారణ్యంగా పిలువబడేవి. ఈ నరసింగపాడు గ్రామములోని ఈ ప్రశస్తమైన భూమిలో ఈశాన్య, నైరుతి ప్రాంతములలో పమిడిమర్రి వంశస్థులవి కాగా, ఆగ్నేయ, వాయువ్య ప్రాంతములు చెరుకుపల్లి వంశస్థులవి. ఈ వాయువ్య ప్రాంతములోనే ఈ ప్రాచీన ఆలయము కలదు. చాలా కాలము వరకు ఉపేక్షించబడిన ఈ ఆలయ అభివృద్ధికి శివ భక్త పరాయణులైన పమిడిమర్రి, చెరుకుపల్లి వంశస్థులు స్వామివార్లకు అవిచ్ఛిన్నముగా ధూప, దీప, నైవేద్యములు జరిగే విధముగా, అర్చకుల జీవన భృతికి సరిపోవునట్లుగా కొంత భూమిని ఆలయ మాన్యంగా స్వామి వారికి సమర్పించారు. బ్రాహ్మణ గోత్రీకులైన కొమ్మవరపు వంశీయులు అనాదిగా ఆలయ అర్చకులుగా వ్యవహరిస్తున్నారు. శాలివాహన శకం 1880 సం|| (అనగా 1958 సం||) లో అప్పటి ఆలయ ధర్మకర్త అయిన చెరుకుపల్లి వెంకట శివయ్యగారు సంకల్పబలంతో పూజ్యులైన పరమ హంస పరివ్రాజకాచార్య శ్రీ బెల్లంకొండ స్వాముల వారు మరియు గుంటూరు జిల్లా చౌటపల్లి వద్దగల కొత్తరెడ్డిపాలెం ఆశ్రమ వాసి శ్రీ కొమ్మరాజు లక్ష్మీ కాంతానంద యోగి వర్యుల సంయుక్త ఆధ్వర్యంలో 40 దినములు విశేషమైన అర్చనలతో సంప్రోక్షణ కార్యక్రమము నిర్వహించి ఆలయ ప్రశస్తిని ఇనుమడింప చేశారు. ఆ సందర్భములోనే కవి సమ్రాట్ శ్రీ విశ్వనాథ సత్యనారాయణ గారు ఆ ఆలయమును సందర్శించి స్వామిని స్తుతిస్తూ 100 పద్యములను రచించి శ్రీశైల మల్లిఖార్జున, శ్రీకాళహస్తి మహాదేవస్తుతులతో పాటుగా తమ "మధ్యాక్కరలు" అనే పద్య కావ్యములో పొందుపరిచారు. ఈ శతకములో విశ్వనాథ వారు "నెకరికల్లు ప్రాంత సిద్ధాభి హేళ" అను దానిని మకుటముగా ఉంచారు.